Farogh Zaidi
ilm-o-hunar se qaum ko raghbat nahin rahi
is par shikayaten ki fazilat nahin rahi
badlega kya nizam kab aa.ega inqilab
jab naujavan lahu men hararat nahin rahi
mazlum ko dila.e jo har zulm se najat
aisi jahan men koi adalat nahin rahi
sajde men ja ke mangna be-kar ne.amaten
kuchh bhi kaho use ye ibadat nahin rahi
fatve liye hain shaiḳh se pir-e-mughan ne ḳhaas
piine men ab zara bhi qabahat nahin rahi
masjid ka ruḳh kiya hai janab-e-‘farogh’ ne
lagta hai ab gunah men lazzat nahin rahi
Leave a Reply