Har Ek Harf Ho Imkan Tere Jaisa Ho

har ek harf ho imkān tere jaisā ho

mirī kitāb kā unvān tere jaisā ho

hazār baar gavārā hai pārsā.ī ko

jo merī zaat pe bohtān tere jaisā ho

koī savāl jo mushkil na ho tire jaisā

koī javāb jo āsān tere jaisā ho

maiñ umr-qaid ba-sad-nāz kaaT saktī huuñ

agar nasīb meñ zindān tere jaisā ho

mohabbatoñ kā sila ho to ho tire jaisā

mohabbatoñ meñ ho nuqsān tere jaisā ho

mujhe qubūl hai bār-e-digar ināyat ho

magar ye shart hai ehsān tere jaisā ho

shifā bhī detā hai ye mo.ajiza mohabbat kā

kisī marīz kā īmān tere jaisā ho

Leave a Comment