har ek harf ho imkan tere jaisa ho
miri kitab ka unvan tere jaisa ho
hazar baar gavara hai parsa.i ko
jo meri zaat pe bohtan tere jaisa ho
koi saval jo mushkil na ho tire jaisa
koi javab jo asan tere jaisa ho
main umr-qaid ba-sad-naz kaaT sakti huun
agar nasib men zindan tere jaisa ho
mohabbaton ka sila ho to ho tire jaisa
mohabbaton men ho nuqsan tere jaisa ho
mujhe qubul hai bar-e-digar inayat ho
magar ye shart hai ehsan tere jaisa ho
shifa bhi deta hai ye mo.ajiza mohabbat ka
kisi mariz ka iman tere jaisa ho
Leave a Reply