mata-e-shauq to hai dard-e-rozgar to hai
agar bahar nahin ishrat-e-bahar to hai
ada-e-chak-e-gareban se ba-ḳhabar na sahi
junun-e-shauq ko farda ka e.atibar to hai
taras rahe hain dil-o-jan jo rang-o-bu ke liye
mire nasib men ik dasht-e-intizar to hai
kahan nasib havas ko junun ki ara.ish
lahu lahu hai gareban taar taar to hai
in ablon ko hiqarat se dekhne vaale
in ablon se chaman ka tire vaqar to hai
hazar tarah se rusva hain ahl-e-dard to kya
tira dayar to hai tera rahguzar to hai
hayat talḳh sahi roz-o-shab haram sahi
dil-o-nazar ko ye mahaul sazgar to hai
Leave a Reply