Anand Narayan Mulla
gham ke badal phir bhi chha.e rah ga.e
aankh se dariya ke dariya bah ga.e
ḳhauf-e-uqba aur is duniya ke ba.ad
vo bhi sah lenge jo ye gham sah ga.e
kis ne dekha hai jamal-e-ru-e-dost
sab naqabon men ulajh kar rah ga.e
muḳhtasar thi dastan-e-arz-e-shauq
bujh ke kuchh taare mizha par rah ga.e
ziist hai ik shaam afsane ka naam
apni apni dastan sab kah ga.e
tab kahin ja kar mili sat.h-e-sukun
Duub kar jab gham men tah-dar-tah ga.e
vaar kar ke ziist bhagi aur ham
astin apni chaḌhate rah ga.e
chand shaitan band kar ke ḳhush hain yuun
jaise bahar sab farishte rah ga.e
ashk ban paa.e na gham ke tarjuman
ye numa.ish hi men apni rah ga.e
zindagi se laḌ na paaya josh-e-dil
par bahut tole magar rah rah ga.e
ashk the jab tak farozan gham na tha
ab andhere men akele rah ga.e
jeben sab yaron ne bhar liin bazm men
ek ‘mulla’ the jo yunhi rah ga.e
Leave a Reply