sulagti aag thi na jalte ashiyane the
bahut hasin vo guzre hue zamane the
hamari ankhon ko us ka ḳhayal hi kab tha
ki in labon ko bhi kuchh roz muskurane the
sharik-e-bazm isi vaste hua na koi
shab-e-nashat ka.i gham gale lagane the
ye aur baat ki chehre pe ajnabiyyat thi
ta.alluqat to un se bahut purane the
ajiib shart thi us ki bhi ai ‘asad’-rizvi
hava thi tez bahut aur diye jalane the
Leave a Reply