ye mahr o mah be-charagh aaise ki raakh ban kar bikhar rahe hain
ham apni jaan ka diya bujha.e kisi gali se guzar rahe hain
ye dukh jo matlub ka mila hai fishar apni hi zaat ka hai
ki ham ḳhud apni talash men hain aur apne sadmon se mar rahe hain
vajud kyuun hai shuhud kyuun hai sabat kya hai najat kya hai
inhi savalon ki aag le kar ham apna isbat kar rahe hain
ai vaqt ke be-qayas dhare kidhar hain vo ham-nasab hamare
jo ek zinda ḳhabar ki ḳhatir ḳhud aap se be-ḳhabar rahe hain
aziyyaton ka nuzul mauquf ḳhaak uḌane hi par nahin hai
azaab un ko bhi to mile hain jo log apne hi ghar rahe hain
nazar men itni shabahaten hain ki us ki pahchan kho ga.i hai
sama.aton men hai shor itna ki har sada se mukar rahe hain
hamare andar ka ḳhauf ‘sabir’ shikast dene laga hai ham ko
lahu ki rut ab guzar ga.i hai dilon men sahra utar rahe hain
Leave a Reply