Sufi
ye shauq saare yaqin-o-guman se pahle tha
main sajda-rez nava-e-azan se pahle tha
hain kaenat ki sab vus.aten usi ki gavah
jo har zamin se har asman se pahle tha
sitam hai us se kahun jism-o-jan pe kya guzri
ki jis ko ilm mire jism-o-jan se pahle tha
usi ne di hai vahi ek din bujhaega pyaas
jo soz-e-sina-o-ashk-e-ravan se pahle tha
usi se thi aur usi se rahegi apni talab
jo aarzu ki har ik in-o-an se pahle tha
vo sun raha hai miri be-zabaniyon ki zaban
jo harf-o-saut-o-sada-o-zaban se pahle tha
ye hamd husn-e-bayan hai mira ki ijz-e-suḳhan
har ek vasf jab us ka bayan se pahle tha
Leave a Reply