Ye Hadisa Mujhe Hairan Kar Gaya Sar-E-Sham

Pirzada Qasim

ye hadisa mujhe hairan kar gaya sar-e-sham

jo zakhm subh mila tha vo bhar gaya sar-e-sham

mile the ham kahin kar-e-jahan ke mele men

use bhi jaldi thi aur main bhi ghar gaya sar-e-sham

ye aaj kis ko achanak mira khayal aaya

charagh raah men ye kaun dhar gaya sar-e-sham

khayal-e-yar ki fursat bhi ab kise hai nasib

ye phuul subh khila aur bikhar gaya sar-e-sham

tamam din ki thakan se main bujh raha tha magar

kisi ki yaad ka chehra nikhar gaya sar-e-sham

shab-e-firaq ka ahval yaad aa hi gaya

phir ek tiir sa dil men utar gaya sar-e-sham

ye subh-o-sham mire is qadar hi mere hain

ki ji utha huun sahar-dam to mar gaya sar-e-sham