Vishvanath Dard
tum ne hamara saath diya to ḳhud ko ham pa ja.enge
varna apni zaat se hamdam phir dhoka kha ja.enge
kaḌi dhuup men ham le aa.e apne komal giton ko
un ke phuul se chehre dekhen dhuup men kumhla ja.enge
ankhen muund ke chalne vaale dhun ke pakke nikle to
chalte chalte ik din aḳhir manzil ko pa ja.enge
kaun havaon ke par bandhe kaun hamara rasta roke
aag ka dariya hoga to bhi tair ke ham aa ja.enge
dana.i ke shahr ke baasi pagal-pan ke jangal men
jangal vaalo aankh bacha kar aag si bhaḌka ja.enge
man ki aankh khule to samjho nuur ka ziina chaḌhna hai
varna tan ki aankh ke shishe dhuup men dhundla ja.enge
dard-hava ka pichha karna sab ke bas ki baat nahin
apna pichha karte karte dost bhi ukta ja.enge
Leave a Reply