Mere Afkar-O-KHayalat Ka Mehwar Tum Ho

mere afkār-o-ḳhayālāt kā mehvar tum ho

al-ġharaz merī har ik baat kā mehvar tum ho

mere din-rāt haiñ mansūb tumhīñ se ba-ḳhudā

din kā mehvar bhī ho tum raat kā mehvar tum ho

kyoñ na maqbūl-e-zamāna hoñ hikāyāt mirī

merī tābinda hikāyāt kā mehvar tum ho

ye haqīqat vahī samjheñge jo haiñ ahl-e-nazar

mere sab kashf-o-karāmāt kā mehvar tum ho

kyoñ na pur-soz hoñ ash.ār ġhazal ke merī

mere ash.ār mirī zaat kā mehvar tum ho

Leave a Comment