kho gaya hai jo us ko khone do
phir naya ḳhvab mujh ko bone do
bastiyon ko ujaḌne vaalo
ab madari ka khel hone do
ḳhvahishon ḳhvab dekhna chhoḌo
niind aa.i hai mujh ko sone do
raushna.i na ḳhatm ho jaa.e
kaghazon ko siyah hone do
har ghaḌi ye ḳhayal aata hai
zindagi ke hain sirf kone do
jhuuT buniyad hi nahin rakhta
ru-ba-ru sach se sab ko hone do
ansuon se dhuli zaminon par
ab zara dhuup ko bhi rone do
chand kyon jagta hai saath mire
raat ke baj rahe hain paune do
Leave a Reply