Makhmoor Jalandhari
paband-e-ehtiyat-e-vafa bhi na ho sake
ham qaid-e-zabt-e-gham se riha bhi na ho sake
dar-o-madar-e-ishq vafa par hai ham-nashin
vo kya kare ki jis se vafa bhi na ho sake
go umr bhar na mil sake aapas men ek baar
ham ek dusre se juda bhi na ho sake
jab juzv ki sifat men kul ki sifat hain
phir vo bashar hi kya jo ḳhuda bhi na ho sake
ye faiz-e-ishq tha ki hui har ḳhata muaaf
vo ḳhush na ho sake to ḳhafa bhi na ho sake
vo astan-e-dost pe kya sar jhuka.ega
jis se buland dast-e-dua bhi na ho sake
ye ehtiram tha nigah-e-shauq ka jo tum
be-parda ho sake jalva-numa bhi na ho sake
‘maḳhmur’ kuchh na puchhiye majburi-e-hayat
achchhi tarah ḳharab-e-fana bhi na ho sake
Leave a Reply