Murli Dhar Shad
shab-e-hijr men yaad aana kisi ka
sata.e hue ko satana kisi ka
kabhi pyaar ki baten vo chupke chupke
kabhi naaz se ruuTh jaana kisi ka
vo bholi ada.en na kyuun yaad aa.en
laḌakpan men tha kya zamana kisi ka
kabhi thi vo ghusse ki chitvan qayamat
kabhi ajizi se manana kisi ka
vo dil ban ke dam-e-mohabbat men aaya
ki zulfon men tha ashiyana kisi ka
nazar lag ga.i mere dushman ki mujh ko
qayamat hua ruuTh jaana kisi ka
khila.ega gul rang la.ega ai ‘shad’
tujhe dekh kar muskurana kisi ka
Leave a Reply