tu ḳhush-nasib hai har shaḳhs hai asiron men
likha hua hai tire haath ki lakiron men
jo ho sake to mujhe bhi kahin talash karo
main kho gaya huun ḳhayalat ke jaziron men
ye inqilab-e-zamana nahin to phir kya hai
amir-e-shahr jo kal tha vo hai faqiron men
hamen ye chahiye hushiyar rahbaron se rahen
ki zahr bhi hain lage maslahat ke tiron men
saḌak pe ho gaya phir koi hadisa shayad
ik iztirab sa lagta hai rahgiron men
ḳhulus-e-fan hi to ‘nadir’ ka hai ki shamil hai
ab us ka naam bhi shahr-e-suḳhan ke miron men
Leave a Reply