kaale kapde nahin pahne hain to itna kar le
ik zara der ko kamre men andhera kar le
ab mujhe paar utar jaane de aisa kar le
varna jo aae samajh men tiri dariya kar le
khud-ba-khud rasta de dega ye tufan mujhe
tujh ko paane ka agar dil ye irada kar le
aaj ka kaam tujhe aaj hi karna hoga
kal jo karna hai to phir aaj taqaza kar le
ab bade logon se achchhai ki ummid na kar
kaise mumkin hai karaila koi mitha kar le
gar kabhi rona hi pad jaae to itna rona
aa ke barsat tire samne tauba kar le
muddaton baad vo aaega hamare ghar men
phir se ai dil kisi ummid ko zinda kar le
ham-safar laila bhi hogi main tabhi jaunga
mujh pe jitne bhi sitam karne hon sahra kar le
Leave a Reply