Poet
koi kafir hamen samjhe ki musalman samjhe
ham to ai ishq tujhe hasil-e-iman samjhe
lakhon masle hue ghunche nahin dekhe ham ne
chand hanste hue phulon ko gulistan samjhe
ḳhud-ba-ḳhud vaqt pe ho jaate hain saman kyunkar
kuchh jo samjhe to hamen be-sar-o-saman samjhe
davat-e-am hai ik rah-e-vafa hai main huun
vo mire saath chala aa.e jo asan samjhe
baghban ki mire sahab-nazari kya kahna
phuul gulshan pe hanse aap baharan samjhe
hans ke mil lete hain ahbab yahi kaafi hai
kis ko fursat ki kisi ka gham-e-pinhan samjhe
ghuncha-o-gul ke tabassum ki haqiqat kya hai
pahle kanTon se guzar jaa.e to insan samjhe
vo zamane men ḳhushi pa nahin sakte ‘sharib’
ansuon ko jo ilaj-e-gham-e-dauran samjhe
Leave a Reply