tumhare kaam agar aa.e muskurane men
to koi harj nahin mere TuuT jaane men
faroḳht ho ga.i har shai jo dil makan men thi
main itna ḳharch hua huun use kamane men
main apni jaan se ja.unga hai ye sach lekin
use bhi zaḳhm to a.enge azmane men
vo ek lafz-e-mohabbat na bin saka mujh se
hazar baar miTa huun jise banane men
tumhen to sirf ḳhabar hai charagh jalne ki
hamare haath jale hain use jalane men
tumhare vasl ki masti thi aur mai-ḳhana
sharab le ke gaya tha sharab-ḳhane men
imaraton men mohabbat ka devta hai vo
hamare haath kaTe hain jise banane men
Leave a Reply