Nida Fazli
ek hi dharti ham sab ka ghar jitna tera utna mera
dukh sukh ka ye jantar-mantar jitna tera utna mera
gehun chaval bantne vaale jhuta taulen to kya bolen
yuun to sab kuchh andar bahar jitna tera utna mera
har jivan ki vahi virasat aansu sapna chahat mehnat
sanson ka har bojh barabar jitna tera utna mera
sansen jitni maujen utni sab ki apni apni ginti
sadiyon ka itihas samundar jitna tera utna mera
khushiyon ke batvare tak hi unche niche aage pichhe
duniya ke mit jaane ka dar jitna tera utna mera
Leave a Reply