Diya Jala Bhi Nahin Jo Use Bujha Diya Jae

Raziya Subhan

diya jala bhi nahin jo use bujha diya jaa.e

hamen bhi vaqt se pahle hi ab sula diya jaa.e

yahi raza hai agar katib-e-muqaddar ki

to jo panap na sake phir use miTa diya jaa.e

rahe na zad men kisi bhi badalte mausam ki

nihal-e-dil pe vahi phuul ik khila diya jaa.e

kisi ko paane ka ehsas is tarah se rahe

to bazm-e-dost se dushman ko hi uTha diya jaa.e

falak ko chhune ki be-sud aarzu na mile

main ḳhaak huun to mujhe ḳhaak men mila diya jaa.e

yahi mutalba ‘raziya’ hai aaj munsif se

hamare sabr-o-raza ka koi sila diya jaa.e