Sufi

Jo Ek Pal Ko Bujhe Bazm-e-Rang-O-Bu Ke Charagh

jo ek pal ko bujhe bazm-e-rang-o-bu ke charagh

to ham ne daar pe raushan kiye lahu ke charagh

hava-e-tira-nasab kya bujha sakegi unhen

ki andhiy.on men bhi jalte hain aarzu ke charagh

ada-e-mausam-e-gul ka kamal kya kahiye

kali kali se farozan hue numu ke charagh

bujhi jo sub.h to sinon men dil jalae gae

hui jo shaam to raushan hue subu ke charagh

ye naqsh-e-pa hain mire ya savad-e-manzil tak

qadam qadam pe numayan hain justuju ke charagh

kabhi kabhi to ‘ziya’ vo bhi vaqt aata hai

bujhane padte hain khud apni aarzu ke charagh

More Poems

Leave a Comment