Poet
sahra ki tarah shahr-e-vafa hai ki nahin hai
har sahib-e-dil abla-pa hai ki nahin hai
pahchante hain log tire naam se mujh ko
ab tera pata mera pata hai ki nahin hai
taskin ke lamhat ko tarsi hui duniya
halat se har chand ḳhafa hai ki nahin hai
namus-e-vatan luTne valon ke liye bhi
ya-rab koi a.in-e-saza hai ki nahin hai
is zulf ke saa.e men ye ehsas jala.e
hanste hue sahra pe ghaTa hai ki nahin hai
jis husn ka partav miri taqdir badal de
vo mere liye zill-e-huma hai ki nahin hai
‘nusrat’ main isi fikr men rahta huun pareshan
insan ko haqiqat men fana hai ki nahin hai
Leave a Reply