Poet
dilbaron ke raaz ka mahram hua
dard se dil misl-e-jam-e-jam hua
rat-din aansu bahe matam hua
dard furqat ka na lekin kam hua
rah gaya huun ban ke ik tasvir-e-gham
gham ke hathon haa.e kya aalam hua
zaḳhm khaa.e ek muddat ho ga.i
soz-e-dil lekin nahin maddham hua
dard-e-ulfat ki hasin tashkil men
imtizaj sho.ala-o-shabnam hua
ek uThna tha nigah-e-naz ka
donon aalam ka ajab aalam hua
pur-ḳhatar pur-pech hai rah-e-hayat
chal saka jitna bhi jis men dam hua
phir saba men hai na.i divangi
kya mizaj-e-zulf phir barham hua
vaqt ne paiham laga.e dil pe zaḳhm
vaqt ḳhud hi un ka phir marham hua
aa.i ik allahu-akbar ki sada
sar mira pesh-e-sanam jab ḳham hua
na-rasa jitne rahe naale mire
is qadar iman mira mohkam hua
raaz se ahl-e-havas hain munharif
ye bhi goya sajda-e-adam hua
Leave a Reply