Tara Tara Utar Rahi Hai Raat Samundar Mein

taarā taarā utar rahī hai raat samundar meñ

jaise Dūbne vāloñ ke hoñ haath samundar meñ

sāhil par to sab ke hoñge apne apne log

rah jā.egī kashtī kī har baat samundar meñ

ek nazar dekhā thā us ne aage yaad nahīñ

khul jaatī hai dariyā kī auqāt samundar meñ

maiñ sāhil se lauT aayā thā kashtī chalne par

pighal chukī thī lekin merī zaat samundar meñ

kaaT rahā huuñ aise ‘amjad’ ye hastī kī rah

be-patvārī naav pe jaise raat samundar meñ

Leave a Comment