kiran to ghar ke andar aa ga.i thi
sunahri dhuup kyuun kajla ga.i thi
kuchh aisi be-hisi se pesh aaya
ki meri be-kasi sharma ga.i thi
chhanaka to mire andar hua tha
tiri avaz kyuun bharra ga.i thi
vahi rishte vahi naate vahi gham
badan se ruuh tak ukta ga.i thi
janam pa kar janam paaya na main ne
mujhe lafzon ki nagan kha ga.i thi
thakan men Dhal gaya lahja kisi ka
miri ḳhvahish ko bhi niind aa ga.i thi
vo chingari hua banhen bikhere
lipaT kar mujh ko bhi jhulsa ga.i thi
vo kab andar tha jo bahar na aaya
‘najib’ ik baat kya samjha ga.i thi
Leave a Reply