Ali Ahmad Jalili
ek khiḌki gali ki khuli raat bhar
muntazir jaane kis ki rahi raat bhar
ham jalate rahe apne dil ke diye
tirgi qatl hoti rahi raat bhar
meri ankhon ko kar ke ata ratjage
meri tanha.i soti rahi raat bhar
ek ḳhushbu darazon se chhanti hui
dastaken jaise deti rahi raat bhar
dil ke andar koi jaise chalta raha
chaap qadmon ki aati rahi raat bhar
ek tahrir jo us ke hathon ki thi
baat vo mujh se karti rahi raat bhar
ek surat ‘ali’ thi jo jan-e-ghazal
mere sheron men Dhalti rahi raat bhar
Leave a Reply