dagh-dehlvi

Khulta Nahin Hai Raaz Hamare Bayan Se

khulta nahin hai raaz hamare bayan se

lete hain dil ka kaam ham apni zaban se

kya lazzat-e-visal ada ho bayan se

sab harf chipke jaate hain meri zaban se

mashhur raz-e-ishq hai kis ke bayan se

meri zaban se ki tumhari zaban se

fitna bana zamin pe har zarra khaak ka

nikle hain bahr-e-sair vo jis dam makan se

us din se mujh ko niind na aai tamam umr

ik shab mili thi aankh tire pasban se

ye khaak men milae to vo ho sitam-sharik

mujh ko zamin se laag unhen asman se

lena sambhalna ki mire hosh ud chale

aata hai koi mast qayamat ki shaan se

mujh se nazar mila ke tum abru men bal na do

sidha chalega tiir na tedhi kaman se

bazar-e-ishq men hain bahut dil jagah jagah

dekhen vo mol lete hain kis ki dukan se

shorida-sar vo huun ki use sar se tod duun

gar sang-e-hadsa bhi gire asman se

arzan kare farokht agar mai-farosh-e-ishq

lene lagen farishte bhi us ki dukan se

guzri hai azmaish-e-mahr-o-vafa men umr

fursat mujhe mili na kabhi imtihan se

dil bhi bacha jigar bhi bacha khair ho gai

tir-e-nigah paar hua darmiyan se

main tum ko nagavar huun dil mujh ko nagavar

tum mujh se tang aur huun main tang jaan se

haan haan tira raqib se be-shak hai rabt-zabt

rutba yaqin ka hai ziyada guman se

mehr-o-vafa ka naam hai ab baat baat par

ye sun liya hai aap ne kis ki zaban se

kaisa khila hai phuul jab aaya bahar par

puchhe to koi lutf-e-javani javan se

danista ate-jaton se ladta hai raat din

phir ho padi thi aaj tire pasban se

is khub-ru ko bazm-e-hasinan men dekhiye

karta hai an-ban badi an-tan se

ai ‘dagh’ is ki khair manata hai aadmi

koi aziiz badh ke nahin apni jaan se

More Poems

Leave a Comment