ahval mira puchhne aate bhi nahin hain
kis haal men ḳhud hain ye batate bhi nahin hain
vaise to basate hi nahin dil men kisi ko
par jis ko basaya hai bhulate bhi nahin hain
ham milte nahin un se ye un ko hai shikayat
aur ḳhud vo mohabbat se bulate bhi nahin hain
chahe na bulana to na bulva.e vo lekin
yuun ḳhud se magar duur bhagate bhi nahin hain
dil se main kiya karta huun un logon ki izzat
jo nekiyan karte hain jatate bhi nahin hai
un ko bhi sada mujh se mohabbat ka hai da.ava
honTon pe mira naam jo laate bhi nahin hain
jin taur tariqon ko vafa kahte hain ab log
vo taur tariqe hamen aate bhi nahin hain
bas dard ke tanha.i ke ashkon se siva ab
ashiq yahan kuchh aur to paate bhi nahin hain
jis tarah ke ahbab ḳhuda ne diye ‘haidar’
aise mire rishte mire naate bhi nahin hain
Leave a Reply