Parveen Fana Syed
uthi thiin andhiyan jin ko bujhane
vo shamen aur bhadken is bahane
naqaben bijliyon ki rukh pe daale
chaman valon ne laute ashiyane
ye kyuun vahshat se lapka dast-e-gul-chin
kali shayad lagi thi kuchh batane
abhi mauhum hai sajde ka mafhum
jhuka phir kis liye sar kaun jaane
shuur-e-zindagi ki dhaal le kar
chale ham maut se ankhen milane
Leave a Reply