Lab Se Dil Ka Dil Se Lab Ka Rabta Koi Nahin

Khursheed Rizvi

lab se dil ka dil se lab ka rabta koi nahin

hasraten hi hasraten hain mudda.a koi nahin

harf-e-gham-e-na-paid hai ankhon men nam napaid hai

dard ka sail-e-ravan hai rasta koi nahin

apne man ka aks hai apni sada ki bazgasht

dost dushman ashna na-ashna koi nahin

sab ke sab apne garebanon men hain Duube hue

gul se gul tak rishta-e-mauj-e-saba koi nahin

hal-e-zar aisa ki dekhe se taras aane lage

sang-dil itne ki honTon par dua koi nahin

kya koi rakib nahin ham men samand-e-vaqt ka

naqsh-e-pa sab hain to kya zanjir-e-pa koi nahin

main to a.ina huun sab ki shakl ka a.ina-dar

bazm men lekin mujhe pahchanta koi nahin

dil ke Duube se miTi dast-e-shanavar ki sakat

mauj ki tughyaniyon se Dubta koi nahin

aankh michoge to kanon se guzar aa.ega husn

sail ko divar-o-dar se vasta koi nahin

arsh ki chahat ho ya patal ka shauq-e-safar

ibtida ki der hai phir intiha koi nahin

karvan ‘ḳhurshid’ jaane kis gupha men kho gaya

raushni kaisi ki sahra men sada koi nahin