is ke ghar se mere ghar tak ek kahani biich men hai
meri us ki rahguzar tak ek kahani biich men hai
chappa chappa us ki gali ka raha hai mere zer-e-qadam
josh-e-junun se azm-e-safar tak ek kahani biich men hai
zulf-o-lab-o-rukhsar kisi ka hai mera mauzu-e-sukhan
tariki se nur-e-nazar tak ek kahani biich men hai
khun-e-jigar shamil hai mera is gulzar ki raunaq men
sehn-e-chaman se barg o shajar tak ek kahani biich men hai
kaun-o-makan ki har shai men hain fitrat ke asrar-o-rumuz
bahr-o-bar se shams-o-qamar tak ek kahani biich men hai
maal bhi aksar ho jaata hai jaan ka logon ki janjal
batn-e-sadaf se laal-o-gohar tak ek kahani biich men hai
zid na karo tum sun na sakoge ‘barqi’ ka ye soz-e-darun
tir-e-nazar se zakhm-e-jigar tak ek kahani biich men hai
Leave a Reply