aate hain kitne ḳhvab tire roz-o-shab mujhe
vahshat si hone lagti hai koi ajab mujhe
tum ko main gar qubul huun aise hi Thiik huun
aata nahin sanvarne ka koi bhi Dhab mujhe
zalim hai badshah ki hai sab pe furat band
mahsus ho rahe hain sabhi sukhe lab mujhe
bas kuchh dinon ki baat hai main lauT a.ungi
hargiz sada na de koi pichhe se ab mujhe
ye dekhna hai kaun mira is jahan men
yaqub ki to ankhen ata kar ai rab mujhe
vo shaḳhs jab ki ab to miri dastaras men hai
karni nahin hai aur kisi ki talab mujhe
bandi ki tarah qaid huun us ke huzur main
vo badshah hai aur milega hi kab mujhe
Leave a Reply