nami thi aankh men lekin ik e’timad bhi tha
mujhe to hausla jiine ka us ke baad bhi tha
bujhe hue dar-o-divar jante honge
kabhi yahan tire jalvon ka iniqad bhi tha
vo ek ism-e-tavalat jo shab ki kaat sake
vo ism alam-e-vahshat men mujh ko yaad bhi tha
khizan-nasib sahi aaj shakh-sar-e-hayat
hava ka aana kabhi sehn-e-dil men saad bhi tha
sitara dekh ke nikli thi main safar ke liye
magar sitare ko taqdir se inaad bhi tha
Leave a Reply