mere shahr ke saare raste band hain logo
main is shahr ka naghma-gar
jo do ik mausam ghurbat ke dukh jhel ke aaya
taaki apne ghar ki divaron se
apni thaki hui aur tarsi hui
ankhen sahlaun
apne darvaze ke utarte roghan ko
apne ashkon se saiqal kar luun
apne chaman ke jale hue paudon
aur gard-alud darakhton ki
murda shakhon par bain karun
har mahjur sutun ko itna tuut ke chumun
mere labon ke khuun se
un ke naqsh-o-nigar sabhi ji uthen
gali ke logon ko itna dekhun
itna dekhun
meri ankhen
barson ki tarsi hui ankhen
chehron ke angan ban jaaen
phir main apna saaz uthaun
ansuon aur muskanon se jhilmil jhilmil
nazmen ghazlen giit sunaun
apne pyaron
dard ke maron ka darman ban jaun
lekin mere shahr ke saare raston par
ab baad hai lohe ke kanton ki
shah darvaze par kuchh pahre-dar khade hain
jo mujh se aur mujh jaise dil valon ki
pahchan se aari
mere saaz se
sanginon se baat karen
main un se kahta huun
dekho
main is shahr ka naghma-gar huun
barson baad kadi rahon ki
saari aziyyat jhel ke ab vapas aaya huun
us mitti ki khatir
jis ki khushbuen
duniya bhar ki do-shizaon ke jismon ki mahkon se
aur saare jahan ke
sabhi gulabon se
badh kar hai
mujh ko shahr men
mere shahr men jaane do
lekin tane hue nezon ne
mere jism ko yuun barmaya
mere saaz ko yuun rezaya
mera humakta khuun aur mere sisakte naghme
shah-darvaze ki dahliz se
riste riste
shahr ke andar ja pahunche hain
aur main apne jism ka malba
saaz ka lasha
apne shahr ke shah-darvaze
ki dahliz pe chhod ke
phir anjane shahron ki shahrahon par
majbur-e-safar huun
jin ko taj kar ghar aaya tha
jin ko taj kar ghar aaya tha
Leave a Reply