Quaiser Khalid
apni yahi pahchan, yahi apna pata hai
ik umr se ye sar kisi chaukhaT pe jhuka hai
yuun sehr-e-taḳhatub hai har ik samt ki fil-asr
khulta hi nahin kaun yahan kis ka ḳhuda hai
darvaza nahin, biich men divar hai apne
aur dastak-e-divar se dar kam hi khula hai
jab jab dil-e-nazuk pe paḌi choT koi bhi
kuchh din to dhuan dil se har ik lamha uTha hai
is TuTti banti hui duniya men abhi tak
kitnon ka sahara to faqat nam-e-ḳhuda hai
mahsus karen sab hi bayan ho na kisi se
us saada o ma.asum men kuchh aisi ada hai
phal jis pe na the, saaya magar sab ke liye tha
chhitnar shajar ab ke vo andhi men gira hai
kya aur bhi darkar hai kuchh is ke siva bhi
ai shauq-e-talab tere liye vaqt ruka hai
parvazi-e-aflak-e-ḳhirad jab hui aajiz
tab dahr-paraston ne bhi samjha ki ḳhuda hai
ye mehr-o-muravvat to baja, phir bhi mire dost
zalim pe karam zulm se iz.har-e-vafa hai
ab alam-e-fani ki na.i sharhen bhi samjho
jo koi na paḌh paaya tha vo tum ne paḌha hai
ye sabza-o-gul, chand sitare, ye zamana
mil jaa.e ye sab bhii, to haqiqat men ye kya hai
Leave a Reply