Siraj Lakhnavi
miTa sa harf huun bigḌi hui si baat huun main
jabin-e-vaqt pe ik naqsh-e-be-sabat huun main
bata basit zamane hai kya yahi insaf
jo hai adu-e-numud-e-sahar vo raat huun main
guman ye tha ki huun markaz-e-hujum-e-nigah
yaqin ye hai ki mahrum-e-iltifat huun main
hai kis gunah ki syahi miri ghalat-fahmi
main janta tha ki ruh-e-tajalliyat huun main
har ah-e-sard hai uftad-e-ashk ki tafsir
ukhaḌ chale hain qadam vaqf-e-hadsat huun main
paḌhun shikast-e-aza.em ka marsiya kab tak
na jaane kab se sipurd-e-muqaddarat huun main
ye sab durust magar phir yahi kahunga ‘siraj’
ḳhud ik zamana huun ḳhud ek ka.enat huun main
Leave a Reply