Poet
gulshan se aa.e hain na bayaban se aa.e hain
divane tere sarhad-e-imkan se aa.e hain
ik mah-vash ke husn-e-farozan ke faiz se
dil men tajalliyat ke tufan se aa.e hain
ankhon men hai bahar-e-do-alam basi hui
ham log aaj mahfil-e-janan se aa.e hain
kya tere bas men un ka mudava bhi hai koi
dil men jo zaḳhm lutf-e-faravan se aa.e hain
allah re ehtimam-e-baharan ke silsile
sahra men phuul sehn-e-gulistan se aa.e hain
un ke karam ki muft men tauhin ho ga.i
ilzam ham pe tangi-e-daman se aa.e hain
dil ko gham-e-jahan ki shikayat nahin rahi
adab-e-zist sohbat-e-rindan se aa.e hain
kya yaad aa ga.i vo nigah-e-jamil-tar
phir dil men iztirab ke paikan se aa.e hain
‘parvez’ asman ko na badnam kijiye
jitne sitam hain ku-e-nigaran se aa.e hain
Leave a Reply