Wafa Ka Banda Hun Ulfat Ka Pasdar Hun Main

Saail Dehlvi

vafa ka banda huun ulfat ka pasdar huun main

Harif-e-qamri-o-parvana-e-hazar huun main

juda juda nazar aati hai jalva-e-tasir

qarar ho gaya muusa ko be-qarar huun main

ḳhumar jis se na vaqif ho vo surur hain aap

surur jis se na agah ho vo ḳhumar huun main

sama gaya hai ye sauda ajiib sar men mire

karam ka ahl-e-sitam se ummid-var huun main

evaz dava ke dua de gaya tabib mujhe

kaha jo main ne gham-e-hijr se do-char huun main

shabab kar diya mera tabah ulfat ne

ḳhizan ke haath ki boi hui bahar huun main

qarar-dad-e-gareban hui ye daman se

ki purze purze agar ho to taar taar huun main

mire mazar ko samjha na jaa.e ek mazar

hazar hasrat-o-arman ka ḳhud mazar huun main

‘zahir’ o ‘arshad’ o ‘ghalib’ ka huun jigar-gosha

janab-e-‘dagh’ ka tilmiz o yadgar huun main

amiir karte hain izzat miri huun vo ‘sa.il’

gulon ke pahlu men rahta huun aisa ḳhaar huun main