Ghulam Mohammad Qasir
gulabon ke nasheman se mire mahbub ke sar tak
safar lamba tha ḳhushbu ka magar aa hi ga.i ghar tak
vafa ki saltanat iqlim-e-vada sar-zamin-e-dil
nazar ki zad men hai ḳhvabon se tabiron ke kishvar tak
kahin bhi sar-nigun hota nahin iḳhlas ka parcham
juda.i ke jazire se mohabbat ke samundar tak
mohabbat ai mohabbat ek jazbe ki masafat hai
mire avara sajde se tiri chaukhaT ke patthar tak
udasi mu-qalam hai naqsh men rang-e-malal ubhra
tamannaon ke pas-manzar se dil ke pesh-e-manzar tak
Leave a Reply