Ziaul Mustafa Turk
a.ine ke aḳhiri iz.har men
main bhi huun sham-e-abad-asar men
dekhte hi dekhte gum ho ga.i
raushni baḌhti hui raftar men
qatra qatra chhat se hi risne lagi
dhuup ka rasta na tha divar men
apni ankhen hi main bhuul aaya kahin
raat itni bhiiḌ thi bazar men
baar baar aata raha hai tera naam
a.ina hoti hui guftar men
duur tak bichhti chali jaati thi niind
ḳhvab aata hi na tha iz.har men
Leave a Reply