hadis-e-dard ko aḳhir bayan to hona tha
jo karb dil men chhupa tha ayaan to hona tha
vo paas rahte hue faslon ka qaa.il tha
is ehtimam ko phir dastan to hona tha
zamin ka taaj tha vo shaḳhs apni hasti men
zamin se baḌh ke use asman to hona tha
dukhon ki dhuup ke is daur-e-be-muravvat men
mujhe kisi ke liye sa.eban to hona tha
tujhe ye kis ne kaha tha hisab maang us se
ab aisi baat pe jaan ka ziyan to hona tha
jahan sabhi the vahan par nahin tha main lekin
jahan koi bhi nahin tha vahan to hona tha
jo main na hota sar-e-dar dusra hota
kisi ko ḳhalq-e-ḳhuda ki zaban to hona tha
vo ḳhud pasand jafa-kar shaḳhs tha ‘anvar’
natijatan use be-karvan to hona tha
Leave a Reply