Ab Ja Kar Ehsas Hua Hai Pyar Bhi Karna Tha

ab jā kar ehsās huā hai pyaar bhī karnā thā

pyaar jo karnā thā us kā iz.hār bhī karnā thā

avval avval kashtī-e-jāñ ġharqāb bhī honā thī

āḳhir āḳhir sāñsoñ ko patvār bhī karnā thā

sab kuchh paanā bhī thā ham ko sab kuchh khonā bhī

jiit bhī jaanā thā phir jiit ko haar bhī karnā thā

sahrāoñ kī ḳhaak uḌāte andhe rastoñ se

dariyā tak bhī aanā dariyā paar bhī karnā thā

ik ujḌā vīrān sā manzar dekh ke bāhar kā

apne hāthoñ har dar ko dīvār bhī karnā thā

narm mulā.em chehre gahrī niilī ā.ankhoñ vaale

tujh jaise be-mehr ko apnā yaar bhī karnā thā

Leave a Comment