Shafiq Saleemi
ab ja kar ehsas hua hai pyaar bhi karna tha
pyaar jo karna tha us ka iz.har bhi karna tha
avval avval kashti-e-jan gharqab bhi hona thi
aḳhir aḳhir sanson ko patvar bhi karna tha
sab kuchh paana bhi tha ham ko sab kuchh khona bhi
jiit bhi jaana tha phir jiit ko haar bhi karna tha
sahraon ki ḳhaak uḌate andhe raston se
dariya tak bhi aana dariya paar bhi karna tha
ik ujḌa viran sa manzar dekh ke bahar ka
apne hathon har dar ko divar bhi karna tha
narm mula.em chehre gahri niili a.ankhon vaale
tujh jaise be-mehr ko apna yaar bhi karna tha
Leave a Reply