mire pahlu-ba-pahlu jab vo chalti thi gulistan men
faraz-e-asman par kahkashan hasrat se takti thi
mohabbat jab chamak uthti thi us ki chashm-e-khandan men
khamistan-e-falak se nuur ki sahba chhalakti thi
mire baazu pe jab vo zulf-e-shab-gun khol deti thi
zamana nikhat-e-khuld-e-barin men duub jaata tha
mire shane pe jab sar rakh ke thandi saans leti thi
miri duniya men soz-o-saz ka tufan aata tha
vo mera sher jab meri hi lai men gungunati thi
manazir jhumte the bam-o-dar ko vajd aata tha
miri aankhon men anhken daal kar jab muskurati thi
mire zulmat-kade ka zarra zarra jagmagata tha
umand aate the jab ashk-e-mohabbat us ki palkon tak
tapakti thi dar-o-divar se shokhi tabassum ki
jab us ke hont aa jaate the az khud mere honton tak
jhapak jaati thiin anhken asman par maah o anjum ki
vo jab hangam-e-rukhsat dekhti thi mujh ko mud mud kar
to khud fitrat ke dil men mahshar-e-jazbat hota tha
vo mahv-e-khvab jab hoti thi apne narm bistar par
to us ke sar pe maryam ka muqaddas haath hota tha
khabar kya thi ki vo ik roz mujh ko bhuul jaegi
aur us ki yaad mujh ko khuun ke aansu rulaegi
Leave a Reply