tera chehra dekh ke har shab sub.h dobara likhti hai
barg-e-gul par mauj-e-saba bhi naam tumhara likhti hai
chappa chappa mera maazi jis ke dam se raushan hai
apne dil par vo bhi kabhi kya naam tumhara likhti hai
kis ka chehra kis ki ankhen dekh ke kaali lambi raat
soch men Duubi chupke chupke chand sitara likhti hai
be-bas kashti paḌh leti hai fitrat ki vo bhi tahrir
mauj-e-bala jab ab-e-ravan par koi ishara likhti hai
karobar-e-shauq men ab to halat ye aa pahunchi hai
sub.h ziyan tahrir kare to shaam ḳhasara likhti hai
raat ki kaali tahriron se tab tak huun mahfuz ‘nizam’
ek sitara jab tak ruḳh par sub.h ka taara likhti hai
Leave a Reply