Asbab-E-Hast Rah Mein Lutana Pada Mujhe

asbab-e-hast rah men lutana pada mujhe

phir khali haath dahr se jaana pada mujhe

sab log tere shahr ke mazi-parast the

mushkil se haal men unhen laana pada mujhe

pahle banae aankh men khvabon ke maqbare

phir hasraton ko dil men dabana pada mujhe

mujh ko to khair khana-badoshi hi raas thi

tere liye makan banana pada mujhe

kuchh aur jab raha na zariya maash ka

kandhon pe bar-e-ishq uthana pada mujhe

duniya ye ghumti rahe parkar ki tarah

ik daera zamin pe banana pada mujhe

ik din ye ji men aai vo ankhen hi phod duun

jin ke liye azaab uthana pada mujhe

apne muamle men hi shiddat-pasand thi

apne liye hi jaan se jaana pada mujhe

Leave a Comment