Shahar ujDe Hue KHwabon Ke Basae Kya Kya

Makhmoor Saeedi

shahar ujḌe hue ḳhvabon ke basa.e kya kya

niind men ham ne dar-o-bam saja.e kya kya

har qadam par kisi manzil ka guzarta tha guman

raah chalte hue manzar nazar aa.e kya kya

ham ki phir teri haqiqat pe nazar kar na sake

zindagi tu ne hamen ḳhvab dikha.e kya kya

ik sitara ki chamakta hai bahut duur kahin

zulmat-e-shab men hamen paas bula.e kya kya

mausam-e-gul men tira ham se juda ho jaana

yaad aa.e to hamen ḳhuun rula.e kya kya

kho se jaate hain kahin us ka ḳhayal aate hi

ham use bhuul ke bhi bhuul na paa.e kya kya

mundamil ho ga.e sab zaḳhm purane to magar

dil ki ik taaza kasak ham ko sata.e kya kya

kya masafat hai ki hairan kiye deti hai

har guzarta hua pal samne laa.e kya kya

ansuon ne tiri tasvir bhi dhundli kar di

naqsh paani pe magar ham ne bana.e kya kya

likhne baiThen jo kabhi umr-e-guzishta ka hisab

ek ik lamha hamen yaad dila.e kya kya

kya kahen vo bhi hamen raas na aa.i ‘maḳhmur’

ik ḳhushi jis ke liye ranj uTha.e kya kya