Waliullah Wali
vaqt bhi tevar badalta ja.ega
dil bhi apni chaal chalta ja.ega
rafta rafta umr Dhalti ja.egi
aa.ine ka ruḳh badalta ja.ega
jazba-e-isar dil men ho agar
mas.alon ka hal nikalta ja.ega
duriyan bhi qurb banti ja.engi
chand mere saath chalta ja.ega
aap ko milti rahegi raushni
dil hamara yuun hi jalta ja.ega
ḳhun-e-dil apna ba-nam-e-angbin
apne paimane men Dhalta ja.ega
us pe mashriq mehrban hogi ‘vali’
jo bhi gir gir kar sambhalta ja.ega
Leave a Reply