ḳhuun se gundha miTTi ko aur aadam ko ta.amir kiya
uupar vaale ne bhi apne ḳhvabon ko ta.abir kiya
tanha.i ke saaz pe chheḌe saare dard sadaon ke
vahshat ke anchal se lipTe aur use zanjir kiya
jis lahje ko bhi jhuThlaya haath men us ke ḳhaak lagi
jis abru tak haath baḌhaya ham ne us ko tiir kiya
upar jaane vaale raste pasti ke mohtaj kiye
ham jis ke qadmon men baiThe us ko hi jagir kiya
mera chehra dekhne vaalo paḌhna bhi to sikho na
kitne mushkil mausam kaaTe aur un ko tafsir kiya
apna rona rone vaale tu kis khet ki muuli hai
ishq ne tujh se pahle jaane kitnon ko rahgir kiya
Leave a Reply