ban ga.i naaz mohabbat talab-e-naz ke ba.ad
aur bhi aise ka.i raaz hain is raaz ke ba.ad
qadr kya soz-e-tajalli ki sahar saaz ke ba.ad
Thahar sakti nahin shabnam miri parvaz ke ba.ad
apni manzil to bana lete hain duniya vaale
main kahan ja.un tiri jalva-gah-e-naz ke ba.ad
main hi duniya ki sada ban ke nahin huun ḳhamosh
ḳhud bhi chup ho ga.i duniya miri avaz ke ba.ad
log aghaz se karte hain talash-e-anjam
main ne anjam na socha kabhi aghaz ke ba.ad
main gunahgar-e-nasheman huun na paband-e-qafas
fitratan kuchh to sukun chahiye parvaz ke ba.ad
is mohabbat men hai tauhin-e-mohabbat ‘anjum’
vo agar mujh ko pukaren miri avaz ke ba.ad
Leave a Reply