zulm to ye hai ki shaki mire kirdar ka hai
ye ghana shahr ki jangal dar-o-divar ka hai
rang phir aaj digar barg-e-dil-e-zar ka hai
sha.iba mujh ko hava par tiri raftar ka hai
us pe tohmat na dhare mere junun ki koi
mujh pe to saaya mire apne hi asrar ka hai
sirf ye kahna bahut hai ki vo chup-chap sa tha
us ko andaza mare sheva-e-guftar ka hai
kis ne kis haal men chhoḌa tha vafa ka daman
mas.ala ye to miri jaan baḌi takrar ka hai
raat bhar niind na aane ka gila kis se karun
is men bhi haath mire tala-e-bedar ka hai
dard ki dhuup se bachne ke taraddud men khula
silsila ta-ba-ufuq ḳhauf ke ashjar ka hai
rat-din khoj men dariya ki sada rahti hai
aadmi koi tire gaanv men us paar ka hai
har ghaḌi mohtasib-e-shahr ho maujud jahan
kaam is bazm men kya mujh se gunahgar ka hai
jhulna daar pe is ahd men asan hai magar
marhala saḳht bahut jur.at-e-iz.har ka hai
zindagi sa.at-e-maujud ke qadmon men jhukao
faisla aaj yahi vaqt ke darbar ka hai
kis na.e gham se charaghan hai nazar mahfil-e-jan
rang kuchh aur hi ab ke tire ash.ar ka hai
Leave a Reply