Yasmeen Hameed
ufuq tak mera sahra khil raha hai
kahin dariya se dariya mil raha hai
libas-e-abr ne bhi rang badla
zamin ka pairahan bhi sil raha hai
isi takhliq ki asudgi men
bahut bechain mera dil raha hai
kisi ke narm lahje ka qarina
miri avaz men shamil raha hai
main ab us harf se katra rahi huun
jo meri baat ka hasil raha hai
kisi ke dil ki na-hamvariyon par
sambhalna kis qadar mushkil raha hai
Leave a Reply